Eyjólfsstaðir

Sundlaug

Sundlaugin á Egilsstöðum er frábær staður til þess að slappa af og stunda líkamsrækt. Þetta er útisundlaug með heitum pottum og rennibraut. Sundlaugin er staðsett á Tjarnarbraut við íþróttamiðstöð bæjarins.

Gönguleiðir

Öllum okkar gestum er algjörlega frjálst að ganga um land Eyjólfsstaða en við mælum með því að talað sé við starfsfólk okkar til þess að fá nánari upplýsingar um hvar sé gott að fara um því sum staðar eru ekki hentugar gönguleiðir. Einnig þarf að gæta að börnum þar sem ár og skurðir eru í landi okkar.

Skógurinn er auðlind sem er okkur ómetanleg hér á staðnum og frábært að ganga um í hinum gamla Eyjólfsstaðaskógi, sem nú er "opinn skógur" á vegum skógræktar ríksins. Einnig er gaman er að ganga meðfram Sellæk og svo Kaldá og njóta útivistar í þessu fallega landi í jaðri hins nýja Eyjólfsstaðaskógar.

Þekktar gönguleiðir eru fjölmargar í nágrenninu, eins og Hjálpleysa og Hötturinn, hæsti tindur Fljótsdalshéraðs og nafn íþróttafélgs bæjarins. Annar hæsti foss landsins er svo í Fljótsdal, Hengifoss sem fellur um 120 metra.

Eyjólfsstaðaskógur

Eyjólfsstaðaskógur á Völlum er í alfaraleið og tilvalinn útivistar- og áningarstaður. Þar eru góðir göngustígar, rjóður með bekkjum og borðum og grill.

Eyjólfsstaðaskógur er 172 ha að flatarmáli og nær upp í um 250 m h.y.s. Skógurinn er að mestu vaxinn birki. Barrviðir voru fyrst gróðursettir 1949, en aðallega á árunum 1957-1974, mest grenitegundir, sem vaxa eins og best gerist á Íslandi.

Eyjólfsstaðaskógur varð Opinn skógur árið 2004.

Veiði

Grímsáin hefur löngum verið ágæt silungaveiðiá. Hægt er að kaupa veiðileyfi í ánni á Eyjólfsstöðum.

Hestaleiga

Stutt er í hestaleigur sem bjóða upp á léttar og skemmtilega útreiðartúra. Bæði eru hestaleigur á Útnirðingsstöðum og í Atlavík í Hallormsstaðaskógi.